💛

“මං ආදරේ ඔයාට නෙමෙයි”

“මෙයාට”!!!

ඉඳින් මම නුඹට කෙටි පණිවිඩයක් තැබීමි.

“මගෙයි ඔයාගෙයි හැම ෆොටෝ එකක්ම ,හැම පොඩි දෙයක්ම ඩිලීට් කරලා දාන්න”

“මම හැම දෙයක්ම ඩිලීට් කරලා ඉවරයි..හැම දෙයක්ම ..පොඩි දෙයක්වත් මං ගාව දැන් නැහැ”

නුඹ මගෙන් කිසිත් නොඇසූවට නුඹ මගේ පෙම්වතා ගැන හොඳින්ම දන්නා බව මම දනිමි.

.

ප්‍රේමය නම් නුඹ සිතනා පරිද්දෙන් අසම්මතයේ කොටු වී ජීවිත අතරමං කර ගැනීම නම් නුඹ සත්‍ය ලෙසම ප්‍රේමය  කියන්නේ කුමක් ද? කියාවත් හරි හැටි නොදන්නා අයෙකි.නුඹට නොදැනෙනා තැනක මම නැවතුනෙමි. අඩුම තරමේ කලකට පෙර.. මම  නුඹට හරි බරට එවූ කෙටි පණිවිඩ, නුඹට ගත් ඇමතුම් ඒ කිසිත් නොහැඟුනා සේ සිටි ඔබ,රිදවීමේ ,රිදීමේ වේදනාව හොඳ හැටි දැන දැනත් එසේ කරපු නුඹ.. මේ මොහොතේ කුමක් සිතනවා ද? කරනවා ද? මම නොදනිමි.සෙවීමට මට උවමනාවක් ද නැත්තෙමි.නමුත් නුඹට රිද්දිය යුතුය.

අහේතුකව ඇස් තුල පිරි කඳුළු මම පිසදමා ගතිමි.ඉදිරියට කුමක් සිදු වුවත් නුඹ මගේ ජීවිතය අසළ,මගේ ප්‍රේමය අසළ පරාජිතයෙකු බව මම සිතමි.  කිසිත් නො වලහා .. මං සතුව තිබූ නුඹටම වෙන් කළ ප්‍රේමය මට නිකරුණේ තවත් ඉබාගාතේ විසි කර දැමිය නොහැක. එය මම ප්‍රවේසමෙන් මටම පමණක් ආලය කරනා මා වෙනුවෙන්ම හිඳී යැයි මොහොතකට හෝ දෑස් පියාගෙන සිතා ..සිත සනහා ගත හැකි ආදරයක් වෙනුවෙන් ප්‍රවේසම් කොට තැබිය යුතු ය. ඉඳින් දැන් අපි සිටින්නේ නන්නාදුනන ලෝක දෙකක ය.

.

ඇමතුමකි!!! ඒ මගේ පෙම්වතාගෙනි.

“කොහෙද හිටියේ? හොඳටම වැඩ.. දැන් ආයෙත් යන්න හදන්නේ ..ඊට කළින් ඔයාට කෝල් එකක් ගත්තේ..”

මම ගොළු වුණෙමි. කිසිත් නොදොඩා තත්පර ගාණක් ඉඳපු මම ,

“පරිස්සමෙන් යන්න,ඇවිත් කතා කරන්න..බුදුසරණයි”

ඒ මට හොඳටම ඇතිය.මොහොතකට නොව හැම තත්පරයකම සැනහෙන්න ඒ හොඳටම ඇතිය. දවස් ගණන් පැය ගණන් දකින්නට ඕනෑම නැත. අවුරුදු ගණනක් නො දැක සිටියත් , මා වෙනුවෙන්ම වෙන් කරපු ඇමතුමක් ,කෙටි පණිවිඩයක් තිබෙන එක තරම් ප්‍රේමයක් තවත් තියේ දැයි මම නොදනිමි.

ඔව් ප්‍රේමයේ හැටි එහෙමය. ප්‍රේමය බොළඳ ය. ආත්මාර්ථය හොඳ හැටි ඇත. නමුත් ප්‍රේමය කිසි දිනක බෙදිය යුතු නැත. එක හිතකට බැඳෙන්නට හැකි තරමටම පරිණත විය යුතුය. අසම්මතය වේවා ,කුමක් හෝ වේවා නුඹ ප්‍රේමයෙන් බැඳිය යුත්තේ එක හිතකට පමණ ය. එය කිසි දිනක වෙන්දේසි කිරීමට තරම් නුඹ පහත් විය යුතු නැත.

“ඔව් මම ආදරේ උඹට නෙමෙයි”

මෙයාට.!!!

_ අ නූ _